Mujhe Jo Poochtay Ho Tum

Mujhe Jo Poochtay Ho Tum
Mujhe Kitni Muhabbat Hai
Chalo Hum Maap Kartay Hain
Hisaab Apni Muhabbat Ka Khud Apne Aap Kartay Hain
Chalo Sooraj Ko Dekho Tum
Batao Kitni Kirnein Hain
Batao Kitna Roshan Hai
Batao Kitni Hiddat Hai
Chalo Ab Chaand Ko Dekhein
Kay Is Ka Husn Kyon Itna Har Ik Dil Ko Lubhaata Hai
Firaaq Aazarda Aashiq Ko Yeh Kyon Itna Sataata Hai
Yeh Aakhir Kyon Rulaata Hai
Sitaaray Bhi Falak Par Hain
Magar Is Ki Koi Ginti Kabhi Kya Kar Bhi Paao Gay?
Muqaddar Kay Sitaaray Ko Kahin Say Dhoond Laao Gay?
Chalo Saahil Pay Chaltay Hain
Samandar Ki Jahan Bhipri Hui Lehrein
Hamesha Muskuraati Hain
Kinaaron Say Galay Lag Kar
Yeh Phir Kyon Rooth Jaati Hain?
Abhi Baarish Ko Letay Hain
Kay Jis Ki NarmGeen Boondein
Bharay Saawan Mein Kitnay Pyaar Say Humko Bhigoti Hain
Magar Jab Josh Mein Ayen To Duniya Ko Daboti Hain
Baras Jatein Sehraaon Pay Jo Muddat Say Pyaasay Hain
Kahin Pay Reham Karti Hain, Kahin Pay Zulm Dhaati Hain
Chalo Ab Phool Ki Baari
Kay Jis Kay Ishq Mein Bhanwray Nay Kaati Zindagi Saari
Magar Phir Bhi Woh Tanha Hai
Mehak Par Phool Ki Sheda Hai Aakhir Kyon Jahan Itna
Bata Saktay Ho Tum Mujhko Kay Aakhir Raaz Kya Hai Yeh?
Gulon Kay Rang Kitnay Hain?
Gulon Kay Rang Kitnay Hain?
Agar Un Sab Ko Le Aao
To Shayed Main Bata Paoon
Muhabbat Tum Say Kitni Hai
Muhabbat Mujhko Kitni Hai......