Sumandar Mein Utarta Hon To Aankhen Bheeg Jaati Hain

Sumandar Mein Utarta Hon To Aankhen Bheeg Jaati Hain,
Teri Aankhon Ko Parhta Hon To Aankhen Bheeg Jaati Hain,

Tumhari Naam Likhne Ki Ijazat Chin Gayi Jab Se,
Koi Bhi Lafz Likhta Hon To Aankhen Bheeg Jaati Hain,

Teri Yaadon Ki Khushbu Khirkyon Mein Raqs Karti Hai,
Tere Ghum Mein Sulagta Hon To Aankhen Bheeg Jaati Hain,

Main Has K Jhail Laita Hon Judai Ki Sabhi Rasmen,
Gale Jab Us K Lagta Hon To Aankhen Bheeg Jaati Hain,

Na Jaane Ho Gaya Hon Is Qadar Hasas Mein Kab Se,
Kisi Se Baat Karta Hon To Aankhen Bheeg Jaati Hain,

Wo Sab Ghuzre Howe Lamhaat Mujh Ko Yaad Aate Hain,
Tumhare Khat Jo Parhta Hon To Aankhen Bheeg Jaati Hain,

Main Sara Din Bohat Masroof Rehta Hon Mager Jun Hi,
Qadam Chokhat Pe Rakhta Hon To Aankhen Bheeg Jaati Hain,

Her Ik Muflis K Maate Per Alam Ki Dastanen Hain,
Koi Chehra Bhi Parhta Hon To Aankhen Bheeg Jaati Hain,

Bare Logon K Unche Badnuma Aur Sar Mehlon Ko,
Ghareeb Aankhon Se Takta Hon To Aankhen Bheeg Jaati Hain,

Tere Kuche Se Ab Mera Taaluq Wajbi Sa Hai,
Mager Jab Bhi Ghuzarta Hon To Aankhen Bheeg Jaati Hain,

Hazaron Mosamon Ki Hukamrani Hai Mere Dil Per,
Wasi Main Jab Bhi Hasta Hon To Aankhen Bheeg Jaati Hain,